Flora Islandica til sýnis í bókabúðum

Bókin Flora Islandica - safn teikninga Eggerts Péturssonar af 270 íslenskum háplöntum ásamt grasafræðitextum Ágústar H. Bjarnasonar - er nú í fyrsta sinn til sýnis í flestum verslunum Eymundssonar á höfuðborgarsvæðinu. Bókin kom aðeins út í 500 tölusettum eintökum sem öll eru tölusett og árituð af Eggertog eru nú aðeins um 50 eintök eftir. Bókin var lengst af ekki til sölu í bókaverslunum en vegna þess að margir hafa spurt um hana undanfarnar vikur var ákveðið af bókútgáfunni Crymogeu og Eymyndssyni að sýna hana í nokkrum verslunum svo bókaunnendur geti barið þetta stórglæislega prentgrip augum.

Þessi stóra og veglega bók hefur vakið mikla athygli allt frá því að hún kom út um áramótin 2008-2009 og hefur hlotið ýmsar viðurkenningar. Hún var til að mynda valin besta bókverk ársins 2009 í alþjóðlegri hönnunarkeppni, The Cup Awards, þar sem fagfélög hönnuða frá þremur heimsálfum keppa um bestu hönnun á ýmsum sviðum. Þar keppti Flora Islandica fyrir hönd Evrópu. Það eru hönnuðirnir Snæfríð Þorsteins og Hildigunnur Gunnarsdóttir sem eiga heiðurinn af útliti og frágangi bókarinnar.

Flora Islandica komst í hámæli fyrir stuttu þegar eitt eintak bókarinnar var keypt af sýningarstjórum sýningarinnar "Koddu" og makað út í matarleifum. Bókaútgáfan Crymogea fyrir hönd höfunda bókarinnar fór fram á að bókin yrði fjarlægð af sýningunni og henni eytt. Við því var ekki orðið og er málið nú komið í lögformlegan farveg.