Breytingar á stjórnarsamstarfi útilokaðar

Nær útilokað er talið að breytingar verða á skipun stjórnarsamstarfsins. Þá hefur Alþjóðagjaldeyrissjóðurinn skilning á þeirri stöðu sem upp er komin og unnið er að því að sannfæra lánshæfisfyrirtækin um að lækka ekki lánshæfið.

Ríkisstjórnin hefur þriggja þingmanna meirihluta eftir að tveir þingmenn sögðu sig úr þingflokknum fyrir skemmstu, þau Lilja Mósesdóttir og Atli Gíslason, en þess má geta að þau sögðu bæði nei á laugardaginn. Þá hafa tveir ráðherrar ekki neitað því að hafa sagt nei, þeir Ögmundur Jónasson og Jón Bjarnason í Vinstri grænum. Vangaveltur eru uppi um hvort niðurstaðan hafi veikt ríkisstjórnarsamstarfið.

Samkvæmt heimildum fréttastofu er ekki á dagskránni að taka nýjan þingflokk að samstarfinu, eins og t.d Hreyfinguna. Ríkisstjórnin er staðráðin í því að halda stöðunni óbreyttri og glíma við það ferli sem er framundan. Mikill slagkraftur er nú lagður í að sannfæra Norðurlandaþjóðirnar og Alþjóðagjaldeyrissjóðinn, sem lánuðu íslenska ríkinu mikla fjármuni í kreppunni, til þess að sýna þeirri stöðu sem upp er komin skilning.

Samkvæmt heimildum fréttastofu voru fulltrúar Seðlabankans í miklu sambandi við bandarísku lánshæfisfyrirtækin Moody's og Standard og Poor's í síðustu viku til að fá þau til að lækka ekki lánshæfi Íslands í spákaupmennskuflokk ef niðurstaðan í þjóðaratkvæðagreiðslunni yrði nei. Fyrirtækið Fitch Ratings hefur þegar gert slíkt, en talið er að bandarísku fyrirtækin séu skilningsríkari. Lánshæfisfyrirtækin hafa mikið að segja, þótt ýmsum finnist það skrýtið, því fjármögnun t.d Búðarhálsvirkjunar hjá Landsvirkjun verður mikið auðveldari ef bandarísku fyrirtækin tvö lækka ekki lánshæfið.

Már Guðmundsson, seðlabankastjóri, situr nú á ráðherrafundi í stjórnarráðshúsinu. Már segir að unnið sé að því að sannfæra bandarísku fyrirtækin um að lækka ekki lánshæfiseinkunn ríkisins. „Við höfum verið í stöðugu sambandi við þá. Allan tímann, við náttúrulega reynum að veita þeim sem bestar upplýsingar á hverjum tíma. Við höfum ekki átt neina formlega fundi en það getur verið meira að frétta af þessu síðar í dag eða á morgun."

Eruð þið vongóðir um að ykkur takist að það sé hægt að færa þá í allan skilning um að það séu kannski ekki forsendur til að lækka okkur? „Ég skal tjá mig um það þegar ég hef betri upplýsingar," sagði seðlabankastjóri. thorbjorn@stod2.is