Slagkraftur í að sannfæra bandarísku fyrirtækin að lækka ekki Ísland

Már Guðmundsson, seðlabankastjóri, segir að stjórnvöld vinni að því hörðum höndum að sannfæra bandarísku lánshæfisfyrirtækin um að lækka ekki lánshæfiseinkunn íslenska ríkisins.

Már Guðmundsson, seðlabankastjóri, fundaði í morgun með ráðherrum í stjórnarráðshúsinu m.a til að ræða viðbrögð og upplýsingagjöf gagnvart amerísku matsfyrirtækjunum Moody's og Standard og Poor's, en hætta var á að þau færðu lánshæfi ríkisins niður vegna niðurstöðu þjóðaratkvæðagreiðslunnar. Í eyrum margra kann það að hljóma undarlega en í hinum alþjóðlega bankaheimi hafa þessi fyrirtæki mikil völd og ráða því á hvaða kjörum lán ríkja bjóðast. Því er mikilvægt að sannfæra þau um að lækka ekki lánshæfiseinkunn íslenska ríkisins.

Undanfarið hafa sérfræðingar Seðlabankans átt í miklum samskiptum við lánshæfisfyrirtækin til að sannfæra þau um að ef þjóðin segði nei í þjóðaratkvæðagreiðslunni væri íslenskt efnahagskerfi enn traust. Og því væri ekki ástæða til að lækka einkunn ríkisins.

Ekki bráðavandi á Íslandi

„Í fyrsta lagi leggjum við ríka áherslu á að þeir hafi eins góðar upplýsingar og hægt er. Svo leggjum við áherslu á þann styrk sem er inni í myndinni og ég fór yfir í ræðu minni á ársfundi Seðlabankans, eins og varðandi stöðugleikann sem er að nást og undirliggjandi viðskiptaafgang. Við leggjum líka áherslu á að það er ekki bráðavandi varðandi fjármálastöðugleika af þessum sökum því íslenskt fjármálakerfi vinnur á bak við höft og innlánatryggingu og það er ekki hætta á erlendu áhlaupi á bankana eins og var fyrir hrun. Við leggjum líka áherslu á að þetta mál sé nú að fara í ákveðinn skilgreindan feril og það sé æskilegt að það fái að ljúka þeirri meðferð áður en að einhverjar miklar ákvarðanir eru teknar," segir Már Guðmundsson, seðlabankastjóri.

Hann segir að Bandaríkjamennirnir séu meðvitaðir um að Holland og Bretland fái greitt úr þrotabúi Landsbankans. Ertu vongóður um að ykkur takist að sannfæra þessa Bandaríkjamenn um að lækka okkur ekki og sannfæra þá um að það sé ennþá traust kerfið hér, þannig að fyrirtæki eins og Landsvirkjun lendi ekki í fjármögnunarvandræðum? „Það er mjög erfitt að meta líkurnar á þessum tímapunkti. Ég reyni að byggja mitt mat ekki á einhverjum tilfinningum, varðandi vonir eða ótta, heldur áhættumati. Ég held að við munum hafa betri mynd af þessu eftir nokkra daga og ég held að það skipti enn og aftur sköpum að okkur takist að fá þá til að flýta sér ekki of mikið," sagði Már. thorbjorn@stod2.is