Tjón á heimilum í Árbæ

Heitavatnslagnir innanhús hafa brostið í tengslum við bilunina í vestanverðu Árbæjarhverfinu í kvöld. Enn er heitavatnsvatnslaust um vestanverðan Árbæinn og viðbúið að það standi fram eftir nóttu.

Í tilkynningu frá Orkuveitu Reykjavíkur segir að það sé mjög áríðandi að loka fyrir inntak í hús ef lekur úr búnaði og gæta fyllstu varúðar vegna brunahættu. „Hafi fólk orðið fyrir tjóni er því bent að hafa samband við sitt tryggingarfélag," segir í tilkynningunni.

„Bilunina í kvöld má rekja til höggs sem kom á raforkukerfið og sló út dælum í hitaveitunni. Það olli þrýstingssveiflum í hitaveitunni. Sama orsök er að baki þrýstingsfalli sem varð í hitaveitu Þorlákshafnar í kvöld. Þar er vatn að komast á að nýju.  Brýnt er fyrir fólki að skilja ekki eftir opið fyrir heitavatnskrana þar sem hætta getur skapast þegar fullur þrýstingur næst á kerfið á ný,“ segir ennfremur í tilkynningunni frá Orkuveitu Reykjavíkur.