Eldur í fatahreinsun í nótt

Töluvert tjón varð þegar eldur kviknaði í fatahreinsun við Vitastíg í Reykjavík upp úr miðnætti.

Vegfarandi heyrði í reykskynjara þar innandyra og lét slökkviliðið vita. Þegar það kom á vettvang logaði eldur innandyra og hafði allt húsnæðið fyllst af reyk og sóti.

Slökkvistarf gekk vel. Eldsupptök eru ókunn, en engin ummerki voru um innbrot, að sögn lögreglu.

Skömmu áður hafði slökkviliðið verið kallað að Háskólabíói þar sem bíll stóð í björtu báli. Aðrir bílar og mannvirki voru ekki í hættu, en bíllinn gjör eyðilagðist.