Dómar mildaðir yfir kannabisræktendum

Hæstiréttur mildaði í dag dóma yfir tveimur mönnum sem dæmdur höfðu verið í 20 mánaða óskilorðsbundið fangelsi í héraði. Fannst Hæstarétti réttara að dæma mennina í 14 mánaða fangelsi en þeir voru dæmdir fyrir að setja upp fullkomna ræktunarstöð fyrir kannabisplöntur í Þykkvabæ sem lögregla upprætti árið 2009. Um fimmhundruð kannabisplöntur fundust á staðnum, tæplega þrú kíló af kannabislaufum og um 11 grömm af hassi.

Þá fundust í bankahólfi annars mannsins um þrettán milljónir króna í krónu- og evruseðlum. Saksóknari fór fram á að peningarnir yrðu gerðir upptækir en á það féllst héraðsdómari ekki. Hæstiréttur tók ekki afstöðu til þess hluta málsins.