Segir írsku leiðina farna við lausn á vanda OR

Meirihlutinn í Reykjavík og stjórn Orkuveitunnar er að leggja upp með írsku leiðina við lausn á vandamálum Orkuveitu Reykjavíkur. Þetta sagði Þorbjörg Helga Vigfúsdóttir, borgarfulltrúi Sjálfstæðisflokksins, á aukaborgarstjórnarfundi í gær. Hún segir að menn verði að gera sér grein fyrir því að vandi OR sé ekki lausafjárvandi heldur skuldavandi.

„Þó að stærðin sé allt önnur er þetta svipað vandamál í eðli sínu og þegar írska ríkisstjórnin ákvað að bjarga bönkum í Írlandi með því að gangast í ábyrgð fyrir öllum þeirra skuldum. Írska ríkið hélt að um lausafjárvanda væri að ræða og með því að tryggja bönkunum fjármögnun í nokkra mánuði myndi allt lagast. Þetta reyndust reginmistök og sitja írskir skattgreiðendur nú uppi með risavaxið vandamál þar sem bankarnir áttu einfaldlega ekki fyrir skuldum sínum; vandamálið var skuldavandamál en ekki lausafjárvandamál," sagði Þorbjörg Helga.

Þorbjörg sagði að með björgunaraðgerðum til handa Orkuveitunni væri verið að samþykkja að borgarbúar taki óbeint yfir 230 milljarða skuldir sem hvíli á OR með því að færa þær yfir á borgarsjóð annars vegar og viðskiptavini OR hins vegar - sem eru aftur að megninu til borgarbúar. Það er kjarninn í aðgerðunum sem hafa verið kynntar.

Þorbjörg Helga sagði að ekki væri víst að öllum sé ljóst að lítil sem engin skil væru milli skulda OR og Reykjavíkurborgar. „Við erum með tillögu meirihlutans að leggja út í nokkurs konar "írska leið". Við erum að samþykkja að borgarbúar taki óbeint yfir 230 milljarða skuldir sem hvíla á OR með því að færa þær yfir á borgarsjóð annars vegar og viðskiptavini OR hins vegar - sem eru aftur að megninu til borgarbúar. Það er kjarninn í aðgerðunum sem hafa verið kynntar," sagði Þorbjörg Helga í gær.

Hún bætti þó við að meirihlutanum væri kannski vorkunn því hugsanlega væri ekkert val í stöðunni og „írska leiðin" hafi verið valin strax árið 2002. „Ástæðan er sú að þegar Orkuveitan var stofnuð í janúar 2002 var félagið sett upp sem sameignarfyrirtæki. Ástæðan er líklega vegna auðlindanna en auðvelt hefði verið að setja þær í sérstakt sameignarfélag á hvaða tímapunkti sem er. Það þýðir að eigendur Orkuveitunnar hafa verið í beinni ábyrgð fyrir skuldbindingum fyrirtækisins frá stofnun þess," sagði Þorbjörg Helga.