25 ára og yngri tryggð framhaldsskólavist

Stjórnvöld stefna á að tryggja öllum umsækjendum 25 ára og yngri framhaldsskólavist næsta haust.

Öllum umsækjendum í framhaldsskóla, sem eru 25 ára og yngri og uppfylla inngönguskilyrði, verður tryggð skólavist næsta haust. Þetta kemur fram í drögum að aðgerðapakka sem ríkisstjórnin kynnti fyrir aðilum vinnumarkaðarins í gær og Fréttablaðið greinir frá í dag.

Talið er að þessi úrræði og tengdar aðgerðir muni kosta ríkissjóð um 850 milljónir króna á ári.

Gissur Pétursson, forstjóri Vinnumálastofnunar, segir í samtali við Fréttablaðið um sjötíu prósent þeirra ungmenna sem eru atvinnulaus nú eru aðeins með grunnskólapróf, því sé mikilvægt að virkja þessu ungmenni með því að koma þeim aftur í nám.

Auk þessa gera drög stjórnvalda ráð fyrir því að starfstengdum úrræðum fyrir atvinnuleitendur verði fjölgað úr 1.500 í 3.000 á þessu ári, Gissur segir starfstengd úrræði duga langbest til að koma fólki af bótum og í vinnu aftur.