Bæjarstjórinn í Eyjum: Erum vön að passa okkur á sjónum

„Við erum að leita allra leiða til þess að byrja að nýta höfnina aftur. Nú er dýpið að verða nokkuð ásættanlegt en Herjólfur ristir hins vegar meira en æskilegt er," segir Elliði Vignisson, bæjarstjóri Vestmannaeyja, en rætt var við hann í Kastljósi í kvöld.

Líkt og fram kom á Vísi fyrr í dag hefur Elliði ritað Ögmundi Jónassyni, innanríkisráðherra, og Hermanni Guðjónssyni, siglingamálastjóra, bréf þar sem farið er fram á að sérleyfi Herjólfs um siglingar í Landeyjahöfn verði aflétt þannig að smærri skipum verði gefinn kostur á að sigla með farþega milli Landeyjahafnar og Eyja. í bréfinu bendir Elliði á að siglingar í Landeyjahöfn hafa legið niðri frá áramótum og enn virðist sem nokkur dráttur verði á að dýpi við höfnina verði nægjanlegt fyrir Herjólf.

Siglingastofnun segir aftur á móti að með tilliti til öryggissjónarmiða og veðurfars geti stofnunin ekki fallist á opna Landeyjahöfn fyrir farþegasiglingum annarra skipa en Herjólfs. Alþjóðareglur heimila ekki slíkt.

Elliði segir Siglingastofnun vera að sinna sínu hlutverki samkvæmt lögum en bætir við: „Ég bendi á að við erum búin að gera út frá Vestmannaeyjum seinustu þúsund árin og það er ekkert nýtt fyrir okkur að þurfa að passa okkur á sjónum. Við vorum ekki að vísa í nein ákveðin skip. Það eru víða til skip og bátar sem geta notað Landeyjahöfn."