Hænur lokaðar í búri alla ævi

„Næstum öll egg sem eru framleidd eru á Íslandi koma undan hænum sem eru hafðar í búri alla ævi. Ég held að neytendur geri sér ekki grein fyrir hvernig er búið að dýrum hér á landi. Ég held að þeir haldi að ástandið sér betra en það er. Okkur langar til að vekja fólk til meðvitundar um ástandið og reyna að bæta það," segir Sif Traustadóttir, dýralæknir og félagi í nýjum samtökum um aukna velferð búfjár á Íslandi, Velbú.

Unnið hefur verið að stofnun samtakanna síðustu mánuði og verður formlegur aðalfundur innan tíðar.

„Við erum hópur af fólki sem kynntist á fundi hjá Dýraverndunarsambandinu í haust og okkur langaði að stofna samtök þar sem sérstök áhersla er lögð á velferð í búskap. Við viljum vekja athygli á aðstæðum dýra í verksmiðjubúskap," segir Sif.

Hún nefnir sem dæmi að nokkrir íslenskir kúabændur voru nýverið sektaðir vegna þess að þeir lokuðu mjólkurkýrnar sínar inni allt árið, en hleyptu þeim aldrei út eins og lög gera ráð fyrir. „Ég held að fólk trúi því að ástandið hér sé öðruvísi og betra en annars staðar, en þetta er í raun mjög svipað. Sérstaklega er velferðinni ábótavant í eggjaframleiðslu, kjúklinga- og svínakjötsframleiðslu. En þetta er farið að færast líka yfir í mjólkurbúskapinn," segir Sif.

Helstu markmið samtakanna er vekja almenning til vitundarvakningar um meðferð búfjár og hvetja framleiðendur til að fara vel með dýrin.

Verið er að vinna að vefsíðu samtakanna en þar er þegar hægt að nálgast upplýsingar um félagið og stefnumál þess.

Þar segir meðal annars:

„Árið 2009 var tæplega 84.000 svínum og 4,6 milljónum alifugla slátrað. Sama ár borðaði hver Íslendingur að meðaltali 20,5 kg af svínakjöti og 23,5 kg af alifuglakjöti. Þessi dýr voru langflest alin í svokölluðum verksmiðjubúum þar sem efnahagslegur gróði vegur þyngra en velferð dýranna. Í ljósi þess hve mörg dýr eiga í hlut og þeirra aðstæðna sem þau búa við hefur Velbú ákveðið að einbeita sér að því að bæta stöðu dýra í slíkum iðnaði. Til þess þurfum við þína hjálp. Betri búskaparhættir verða ekki að raunveruleika fyrr en neytendur kalla eftir breytingum."

Hægt er að horfa á fræðslumyndband um verksmiðjubúskap og velferð búfjár með því að smella á tengilinn hér að ofan, en myndbandið er unnið af samtökunum Compassion in world farming. Að sögn félagsmanna í Velbú nær þetta myndband vel að skýra markmið samtakanna.

Heimasíðu Velbú má finna með því að smella hér.

Velbú er einnig komið með síðu á Facebook.