Svínabú vilja aðgang að deyfilyfjum

„Hér er þetta bara eins og hjá öllum öðrum svínabúum á Íslandi. Það er bara þessi hefðbundni háttur á að gelda grísi sem hefur verið viðhafður hér í tugi ára. Við höfum ekki aðgang að neinum deyfilyfjum," segir Geir Gunnar Geirsson, framkvæmdastjóri Stjörnugríss sem er stærsta svínabú á landinu.

Geir Gunnar segist oft hafa rætt við dýralækni um mikilvægi þess að starfsmenn á svínabúum fái aðgang að deyfilyfjum til að gefa grísum fyrir geldingu. „Það hefur ekki gengið eftir. Menn líta það hornauga að aðrir en dýralæknar hafi aðgang að sterkum deyfilyfjum þannig að það er langt í land að við fáum að meðhöndla þessi lyf," segir hann.

Vísir hefur í dag fjallað um sársaukafullar geldingar á karlkyns grísum á íslenskum svínabúum og bent hefur verið á að með auknum fjölda grísa séu ekki lengur nægjanlega margir dýralæknar til að sinna geldingunum. Því er svo komið að starfsmenn búanna sinna geldingunum sjálfir, jafnvel þó það sé í trássi við gildandi lög.

„Það hefur lengi verið reynt að finna leið til að gera þetta með sem bestum hætti, með tilliti til dýravelferðar, og vonandi finnum við brátt viðunandi lausn," segir Geir Gunnar.

Verið er að setja á markað hér á landi bóluefni sem hamlar framleiðslu karlhormóna grísa, og er þá um svokallaða lyfjageldingu að ræða.

Ótti við að stinga sig

Geir Gunnar bendir á að lítil sem engin reynsla sé komin á notkun lyfsins hér á landi og hefur hann ákveðnar efasemdir. „Ein af mögulegum lausnum er þetta lyf sem er sprautað í grísina og þá þarf ekki að gelda þá. Það er hins vegar þú hætta að ef karlmenn stinga sig á sprautu með bóluefninu mega þeir ekki nota það aftur. Ef maður stingur sig tvisvar á þessu virkar efnið á karlmann eins og á grís. Það eru því margar spurningar varðandi lyfjageldinguna sem enn er ósvarað. En ef í ljós kemur að þetta er vel til þess fallið að nota þá er að sjálfsögðu ekkert því til fyrirstöðu," segir hann.

Besta lausnin sem Geir Gunnar sér fyrir sér nú er að starfsmenn svínabúa fái leyfi til að nota deyfilyf og fái þjálfun í notkun þeirra.

Rófan brennd af við fæðingu

Geir Gunnar segir ummæli Sigurborgar Daðadóttur dýralæknis um hvernig rófur séu klipptar af grísum, koma sér nokkuð á óvart. „Rófan er alls ekki klippt af grísunum heldur er hún brennd af þeim strax við fæðingu með sjóðandi heitri töng. Grísirnir eru ekki jafn viðkvæmir svona nýfæddir og rófan auk þess mjóst á þessum tíma. Þeir finna ekki mikið fyrir þessu en það væri samt ágætt ef það væri hægt að gefa þeim lyf," segir hann.

Að mati Geirs Gunnars er Sigurborg alls ekki nógu upplýst um aðstöðu grísa á svínabúum hér á landi og tekur fram að hún hafi aldrei talað við hann.

Geir Gunnar segir enn fremur að tennur á grísum séu slípaðar og það sé einmitt gert með dýraverndunarsjónarmið að leiðarljósi. „Þetta er alveg sársaukalaust og er gert til að þeir meiði ekki gyltuna með nagi þegar þeir eru að sjúga spenana. Einnig er viss hætta á að þeir geti meitt hver annan ef þeir fara að slást um spenana," segir hann.

Hann samsinnir síðan því sem Sigurborg segir um að það geti valdið sýkingum ef grísir fara að naga rófuna hver á öðrum. Því sé það með velferð grísanna í huga sem rófan sé brennd af þeim.

„Ég get alveg fullyrt að allir svínabændur á Íslandi vilja að dýrin þeirra hafi það sem allra best og vilja skoða allar leiðir til að ná því fram. Það er engin spurning," segir hann.