Töluvert magn af fölsuðum rakvélablöðum tekið

Tollgæslan lagði hald á töluvert magn af fölsuðum Gillette Fusion Power rakvélablöðum á dögunum. Um var að ræða hraðsendingu frá Hong Kong. Þetta er í fyrsta skipti sem tollgæslan hér á landi leggur hald á fölsuð rakvélablöð, en talið er líklegt að rakvélablöðin hafi verið ætluð til sölu hér á landi.

Tollgæslan segir að það geti reynst erfitt fyrir almenning að þekkja muninn og ekki fyrr en við rakstur að spurningar vakna um lögmæti vörunnar. Hér að neðan eru myndir af fölsuðu rakvélablöðunum og til samanburðar eru ekta rakvélablöð. Gott er að hafa eftirtalin atriði í huga þegar spurningar vakna um mögulega fölsun.



Ef að eitt eða fleirri atriði vekja athygli kaupandans er full ástæða til að íhuga hvort um sé að ræða falsaða vöru.

• Óeðlilega lágt verð
• Örlítill blæbrigðamunur á umbúðunum (t.d. óskýrari stafir, litir og myndir)
• Áberandi gæðamunur á blöðunum auk þess sem greinilegur munur er oftast á útliti þeirra.

Íslensk Ameríska er umboðsaðili fyrir Gillette á Íslandi, samkvæmt frétt á vef Tollstjórans. Tollgæslan segir að tekið sé mjög hart á svona málum og leitað allra leiða til að hafa uppi á eftirlíkingum sem eru til sölu hér á landi. Þeir munu fyrir hönd framleiðanda fara í lögbannsmál gagnvart þeim aðilum sem flytja inn og/eða selja fölsuð eintök frá Gillette.

Samkvæmt upplýsingum frá Bónus kostar pakki af rakvélablöðum með fjórum blöðum 1898 krónur með virðisaukaskatti. Þau eru keypt af umboðsaðilanum.