Fyrir næstu kynslóðir

Stjórnlagaráð var sett í dag en það var aldurforsetinn Ómar Ragnarsson sem setti fyrsta fund ráðsins. Stjórnlaganefnd afhenti fulltrúunum hugmyndir sínar um breytingar á stjórnarskránni en tillögurnar eru í tveimur bindum sem telja samtals 700 blaðsíður. Verkefni ráðsins er að fara yfir hugmyndirnar og koma með tillögu að endurbættri stjórnarskrá. Stjórnlaganefnd sem kjörin var af Alþingi 16. júní í fyrra og Guðrún Pétursdóttir veitti forystu hefur þar með lokið störfum.

Í ávarpi sínu sagði Ómar m.a. „Um þennan sal eiga að blása ferskir vindar nýrra tíma, víðsýni að ráða ríkjum, í þessum sal munum við sem heyra sögu stjórnarbóta allt frá Gulaþingi til þessa dags þegar við ætlum að vinna verk sem ein kynslóð færir kynslóðunum, sem á eftir koma. Við lítum á okkur sem hlekk í keðju kynslóðanna og framvindu sögunnar.“

Stjórnlagaráðsfundi lauk á þjóðlegan máta því fulltrúar sungu Öxar við ána. Ráðið hyggst hafa það til siðs að ljúka fundum sínum á söng.