Kynferðisafbrot fararstjórans misfórst hjá félagsþjónustunni

Fararstjórinn sem var dæmdur í sex mánaða skilorðsbundið fangelsi fyrir að áreita 16 ára stúlku kynferðislega, hafði áður beitt hana kynferðislegri misneytingu. Þá var málið tilkynnt til félagsyfirvalda bæjarfélagsins en samkvæmt dómi Héraðsdóms Reykjavíkur hlaut kæran ekki frekari framgang vegna misskilnings starfsmanna félagsþjónustunnar.

Vísir greindi frá því fyrr í dag að fararstjórinn hefði verið dæmdur fyrir kynferðislega áreitni gagnvart stúlkunni í íþróttaferð erlendis árið 2007. Maðurinn var fararstjóri í ferðinni og bar ábyrgð á ungmennunum.

Eftir að hafa drukkið bjór með ungmennunum lögðust fararstjórinn og stúlkan saman á dýnu í íþróttahúsi þar sem þau dvöldu. Þar káfaði maðurinn á stúlkunni innanklæða.

Svo kemur fram í dóminum að í janúar 2008 áreitti maðurinn stúlkuna aftur. Þá voru þau stödd í samkvæmi og orðið tvö ein eftir í húsinu eftir að samkvæminu lauk.

Fararstjórinn leitaði þá á hana, þrýsti henni upp að vegg og byrjað að kyssa hana. Hann kastaði henni upp í rúm, afklæddi þau bæði, lá ofan á henni og káfaði á henni eins og í fyrra skiptið.

Hann á síðan spurt hana hvort hún væri „hrein mey" og hún svarað því játandi. Hann klæddi sig þá og fór.

Stúlkan átti erfitt með að segja frá þessum atvikum, ekki síst þar sem um var að ræða mann sem hún þekkti og leit upp til. Lýsingar hennar á atburðum voru trúverðugar í alla staði að mati dómsins. Hún hafi lýst lamandi varnarleysi þegar fararstjórinn kom vilja sínum fram án samþykkis hennar, doða, miklum kvíða og almennri vansæld.

Í kjölfarið hafi hún fundið til mikillar reiði. Stúlkan hefur átt erfitt með samskipti við karlmenn eftir að kynferðisbrotin áttu sér stað og sé svo enn. Líðan hennar hafi hins vegar farið batnandi eftir að hún gerði grein fyrir þessum brotum og kærði til lögreglu.

Málið var hinsvegar tilkynnt fyrst til félagsþjónustunnar. Í vottorði frá stofnuninni kemur fram að kæran hafi ekki hlotið frekari framgang. Í bréfi félagsmálastjóra til lögreglu kemur fram að misskilningi starfsmanna félagsþjónustunnar væri að kenna um það að málið var ekki kært til lögreglu á sínum tíma. Þar af leiðandi snéru foreldrar stúlkunnar sér til lögreglunnar sem hóf rannsókn.

Þess má geta að eitt vitnið, sem var með stúlkuna hjá sér í viðtölum vegna sértækra námsörðugleika og erfiðleika tengdum þeim, tilkynnti um málið til félagsyfirvalda árið 2008. Að auki fylgdi vitnið því vel á eftir. Erindinu var hinsvegar ekki sinnt. Lýsir vitnið því að stúlkunni hafi liðið mjög illa vegna skeytingaleysis félagsstofnunarinnar og ekki liðið betur fyrr en það var formlega kært til lögreglunnar.

Ekki kemur fram í dómnum hvaða bæjarfélag sé um að ræða.

Eins og fyrr segir var maðurinn dæmdur í sex mánaða skilorðsbundið fangelsi. Meðal ástæðna fyrir því að dómurinn var skilorðsbundinn var vegna þess hversu langt var um liðið síðan brotin voru framin.

Honum er einnig gert að greiða stúlkunni 400 þúsund krónur í miskabætur.