Fylgishrun kemur formanni VG ekki á óvart

Steingrímur J. Sigfússon, fjármálaráðherra, segir að fylgishrun ríkisstjórnarflokkanna komi ekki á óvart. Hann segir að niðurstaðan í Icesave muni ekki hafa áhrif ríkisstjórnarsamstarfið.

Ríkisstjórnarflokkarnir bíða afhroð í könnun sem MMR gerði fyrir Stöð 2 dagana 4.-6. apríl. Samanlagt fylgi ríkisstjórnarflokkana er minna en fylgi Sjálfstæðisflokks en aðeins þriðjungur kjósenda styður ríkisstjórnina. Framsóknarmenn bæta við sig miklu fylgi og eru samkvæmt könnunni með nánast jafn mikið fylgi og Samfylkingin.

Steingrímur J. Sigfússon, fjármálaráðherra, segir að þetta komi ekki á óvart enda hafi ríkisstjórnin þurft að taka stórar og erfiðar ákvarðanir.

„Þegar þetta er allt lagt saman og þessar afbrigðilegu og óvenjulegu og erfiðu aðstæður sem við höfum verið að glíma við þá þarf það ekki að koma neinum sérstaklega á óvart þó að við gefum eitthvað eftir í fylgi," segir Steingrímur.

Spurður hvort ríkisstjórnin lifi enn eitt neiið í Icesave málinu segir Steingrímur: „Já. Við höfum passað það að tengja þetta ekki á nokkurn hátt við ríkisstjórnina. Þetta eru lög sem meiri en tveir þriðju hluti alþingismanna samþykktu þannig að það snýr meira að þinginu sem stofnun og samskiptum þess við þjóðina ef að lögunum yrði synjað framtíðargildi."