Flutti inn mefedrone en gleymdi hlífðarfötunum

Litháískur ríkisborgari var dæmdur í átta mánaða fangelsi í Héraðsdómi Reykjaness í gær fyrir að flytja tæplega hálft kíló af efninu mefedrone til landsins. Efnið faldi hann í ilmsalti. Tollverðir stöðvuðu manninn við komuna til landsins í desember á síðasta ári og fundu þá ilmsaltið í farangri hans.

Grunur vaknaði um að ekki væri um venjulegt ilmsalt að ræða. Aftur á móti fannst ekkert sem benti til ólöglegra vímuefna þegar efnið var fíkniefnaprófað. Var manninum því sleppt lausum.

Við frekari rannsóknir reyndist baðsaltið vera fíkniefnið mefedron sem, samkvæmt matsgerð Rannsóknarstofu í lyfja- og eiturefnafræði, er hættulegt fíkniefni og að af því hafi hlotist banvænar eitranir og virkni að hluta til mjög svipuð og amfetamíns.

Var maðurinn því handtekinn á ný og færður í gæsluvarðhald. Maðurinn hélt því fram að hann hefði keypt ilmsaltið í búð handa móður vinar síns sem hann heimsótti hér á landi og kynntist í gegnum veraldarvefinn að hans sögn.

Framburður mannsins þótti óstöðugur og þótti dóminum hann beinlínis fjarstæðukenndur. Í niðurstöðu dómsins segir meðal annars að maðurinn hafi haldið því fram að tilgangur ferðar sinnar til Íslands væri áhugi hans á því að skoða landið sem ferðamaður. Orðrétt sagði svo í dóminum:

„[...] frásögn hans um að koma hans hingað hafi átt rót sína að rekja til þess að hann hafi haft áhuga á því að skoða landið  telur dómari fjarstæðukennda, ekki síst í ljósi þess að hann hafði hvorki meðferðis myndavél né hlífðarföt.“

Maðurinn var því dæmdur í átta mánaða óskilorðsbundið fangelsi.