Landfræði á hjólum og Jarðfræðistrætó

Jarðfræði, landfræði og líffræði verða í forgrunni hjá Verkfræði- og náttúruvísindasviði Háskóla Íslands um helgina þegar sviðið heldur áfram að fagna aldarafmæli háskólans með fjölbreyttum viðburðum. Almenningi gefst kostur á að fara í þrjár áhugaverðar skoðunarferðir í fylgd vísindamanna sviðsins.

Fyrsta ferðin verður á morgun laugardag en þá verður farið í rútu um Reykjanes þar sem jarðfræði og fuglalíf nessins verður skoðað. Páll Einarsson, prófessor við Jarðvísindastofnun, annast leiðsögn ásamt Gunnari Þór Hallgrímssyni fuglafræðingi. Páll er einn helsti sérfræðingur landsins í jarðskjálftum og Gunnar Þór hefur unnið að doktorsverkefni um máfa og tófur á Reykjanesi ásamt því að hafa stundað rannsóknir á fuglalífi svæðisins fyrir Náttúrustofu Reykjaness í Sandgerði, að því er fram kemur í tilkynningu. Lagt verður af stað frá Öskju – náttúrufræðahúsi við Sturlugötu klukkan 10 á laugardagsmorgun og áætlað er að koma til baka um klukkan 17.

Á sunnudeginum 10. apríl verður boðið upp á tvær fræðsluferðir, Jarðfræðistrætó og Landfræði á hjólum. Jarðfræðistrætóinn leggur af stað frá Öskju klukku 10 á sunnudagsmorgun. Ekið verður vítt og breitt um borgina og stoppað á völdum stöðum þar sem hugað verður að megindráttum í jarðfræðilegri gerð höfuðborgarsvæðisins. Leiðsögn í Jarðfræðistrætónum verður í höndum Hreggviðs Norðdahls, fræðimanns á Jarðvísindastofnun. Reiknað er með að ferðin taki um þrjár klukkustundir.

Í síðarnefndu ferðinni, Landfræði á hjólum, verður farið í könnunarleiðangur á reiðhjólum um miðborg Reykjavíkur og nágrenni. Staldrað verður við á nokkrum stöðum og fjallað um ýmis atriði borgarumhverfisins með augum landfræðinga, þar á meðal breytingar á landnotkun, íbúasamsetningu og umferðarmál. Karl Benediktsson, prófessor í landfræði, er leiðsögumaður í þessari ferð. Þátttakendur eru beðnir um að mæta á hjóli í Öskju klukkan 13:45 en lagt verður af stað klukkan 14. Gert er ráð fyrir að ferðin taki um það bil tvær klukkustundir.

Vakin er athygli á því að áhugasamir þurfa að skrá sig í skoðunarferðina á Reykjanes á laugardag og sömuleiðis í Jarðfræðistrætóinn á sunnudag. Áhugasamir eru beðnir um að skrá sig með því að senda póst á von@hi.is.