Fjárfestingageta auðmannahópsins sögð vera 1700 milljarðar

Þeir tíu aðilar sem hafa sótt um ríkisborgararétt hjá allsherjarnefnd Alþingis, hafa yfir að ráða 1700 milljörðum til þess að fjárfesta hér á landi, fái þeir ríkisborgararéttinn.

Það var Kastljós sem greindi frá málinu í kvöld en þar kemur fram að tíu Bandaríkjamenn og Kanadamenn, ásamt börnum þeirra, hafa óskað eftir ríkisborgararétti hér á landi til þess að fjárfesta í endurnýjanlegri orku á Íslandi.

Aðilarnir eru á vegum Northern Lights Energy (NLE). Framkvæmdastjóri NLE, Sturla Sighvatsson, sagði í viðtali við Kastljós að tilgangur hópsins væri ekki sá að fjárfesta í fiski og kaupa upp orkuauðlindir hér á landi. Hugmyndir þeirra væru að mörgu leytinu til tengdar nýsköpun.

Aðilarnir sem um ræðir eru þegar í fyrirtækjarekstri orkufyrirtækja í Bandaríkjunum og Rússlandi.

Aðilarnir hafa lagt fram ítarlegar skýrslur sem meðal annars fyrirtækið Kroll vann um persónur sínar. Mötin kosta tvær milljónir króna. Meðal skilyrða fyrir því að vera með í þessum hópi er sú að einstaklingarnir hafi flekklaust mannorð.

Róbert Marshall, formaður allsherjarnefndar, sagði í viðtali við Kastljós að skoða yrði málið vel. Hann tók ekki illa í hugmyndina, og spurði meðal annars að ef Bill Gates myndi til að mynda sækja um ríkisborgararétt hér á landi, myndu þá menn tortryggja það sérstaklega?