Vorið er að koma - þá hefst Listahátíð í Reykjavík

Dans og söngur verða áberandi á Listahátíð í Reykjavík í vor. Fimm hundruð erlendir og innlendir listamenn koma fram á um fjörutíu viðburðum víðs vegar um borgina.

Listahátíðin hefur verið sannkallaður vorboði í höfuðborginni og er hún nú haldin í tuttugasta og fimmta sinn. Miðasala á alla viðburði hófst í dag um leið og vegleg dagskrá var afhjúpuð. Á hátíðinni birtast hinar ýmsu listgreinar með einum eða öðrum hætti en athygli vekur hversu stóra rullu dansinn spilar. Danshópar frá Slóvakíu og Kína sýna verk, að ógleymdum fjöldamörgum íslenskum dönsurum.

„Það er mikill uppgangur í dansheiminum og við endurspeglum það með þessum verkum á hátíðinni í ár," sagði Hrefna Haraldsdóttir, stjórnandi Listahátíðar í Reykjavík.

Margsinnis hafa stór nöfn úr listaheiminum komið fram á hátíðinni og verður engin breyting þar á í ár. Stórtenórsöngvarinn Jonas Kaufmann þenur raddböndin og hljómsveitin Ojos de Brujo flytur gleðipopp, en þess má til gamans geta að margir erlendir aðdáendur þeirra hafa tryggt sér miða á viðburðina. En hvað mun vekja mestu athyglina í ár?

„Um opnunarhelgina, 21.maí, þá fáum við spænskan hóp sem heitir Fura dels Baus og er mjög þekktur í leikhúsheiminum og er svona fjöllistaflokkur sem verður hérna með útiatriði sem er náttúrulega opið öllum og verður í miðborginni. Og með þátttöku fjölda íslenskra dansnema og sirkusfólks þannig að þar get ég lofað góðri skemmtun," sagði Hrefna.