Sigurjón segist hafa rætt erfiðleika bankans á fundi með Baldri

Sigurjón Árnason, fyrrverandi bankastjóri Landsbankans, staðfestir að hafa rætt um erfiðleika bankans á fundi um miðjan ágúst 2008, þar sem meðal annarra var staddur Baldur Guðlaugsson, fyrrverandi ráðuneytisstjóri fjármálaráðuneytisins.

Fyrir dómi nú skömmu fyrir hádegið bar Sigurjón að breska fjármálaeftirlitið hefði sýnt mikinn yfirgang í samningaviðræðum við Landsbankann um innistæðutryggingar vegna Icesave-reikninganna.

Hann man þó ekki nákvæmlega hvenær bankinn gekk að kröfum breska fjármálaeftirlitsins og samþykkti fimm milljarða króna hámark á innistæðum Icesave-reikninga Landsbankans í Bretlandi. Spurður hvort bankinn hafi samþykkt þessa kröfu 20. ágúst 2008 sagði Sigurjón: „Ég man það ekki. Það getur vel verið. Það er alveg líklegt að við höfum samþykkt það. Ég bara man það ekki."

Sigurjón var síðasta vitnið sem kom fyrir Héraðsdóm Reykjavíkur í dag þar sem aðalmeðferð í máli Baldur Guðlaugssonar, fyrrverandi ráðuneytisstjóra fjármálaráðuneytisins, fór fram.

Þann 13. ágúst sat Sigurjón fund ásamt Halldóri J. Kristjánssyni, fyrrverandi bankastjóra Landsbankans, Jónínu S. Lárusdóttur, fyrrverandi ráðuneytisstjóra í viðskiptaráðuneytinu og Baldri Guðlaugssyni. Fundurinn var haldinn af því tilefni að íslenskir embættismenn voru að fara á fund breskra ráðamanna til að ræða málefni íslensku bankanna. Þar kom fram að breska fjármálaeftirlitið gerði auknar kröfur á Landsbankann varðandi tryggingu innistæðna og því mátti öllum fundarmönnum vera ljóst, þar á meðal Baldri, að bankinn var í vandræðum.

Sigurjón bar fyrir dómi að Landsbankinn hafi náð sátt við breska fjármálaeftirlitið um meðferð innistæðna á reikningunum vorið 2008. Um sumarið hafi síðan skyndilega komið annað hljóð í strokkinn hjá eftirlitinu og þar gerðar auknar kröfur á bankann. Sigurjón sagðist hafa upplifað Landsbankann í erfiðum samningaviðræðunum við breska fjármálaeftirlitið eftir það þar sem fyrsta krafan var að ríkisábyrgð yrði sett á innistæðurnar.

„Þeir voru mjög ósveigjanlegir. Þetta var komið á pólitískt level," sagði Sigurjón.

Spurður hvort hann hefði lýst vanda Landsbankans sérstaklega fyrir Baldri þetta haust, sagði Sigurjón. „Ég þekki manninn ekki neitt. Ég hef bara hitt hann á svona fundum við og við," sagði hann.

Eitt vitni á eftir að koma fyrir dóm, Halldór J. Kristjánsson, fyrrverandi bankastjóri Landsbankans.. Málflutningur í málinu fer fram í þarnæstu viku, en ráðgert er að Halldór beri vitni sama dag. Hann er búsettur erlendis.