Hafna ásökunum um verðsamráð

Byggingavöruverslanirnar BYKO og Húsasmiðjan hafna báðar ásökunum um brot á samkeppnislögum. Efnahagsbrotadeild ríkislögreglustjóra og Samkeppniseftirlitið gerðu húsleitir hjá báðum þessum aðilum í morgun. Auk þess var húsleit gerð hjá byggingavöruversluninni Úlfurinn. Til skoðunar er meint verðsamráð milli aðila á byggingavörumarkaði.

Iðunn Jónsdóttir, stjórnarformaður BYKO, segir í tilkynningu til fjölmiðla að fyrirtækið hafi ávallt lagt sig fram um að tryggja að starfsemi fyrirtækisins og viðbrögð þess á markaði séu í samræmi við samkeppnislög. Fyrirtækið hafi unnið með rannsóknaraðilum og afhent þau gögn sem óskað hafi verið eftir.

Sigurður Arnar Sigurðsson, forstjóri Húsasmiðjunnar, sagði í fréttatilkynningu að fyrirtækið vísaði á bug öllum ásökunum og segist aðstoða við rannsókn málsins enda hafi fyrirtækið ekkert að fela.