Skotveiðimenn segja Svandísi hafa svikið sig

Stjórn Skotveiðifélags Íslands harmar þá ákvörðun Svandísar Svavarsdóttur umhverfisráðherra að ætla að samþykkja verndar og stjórnunaráætlun Vatnajökulsþjóðgarðs án breytinga.

Benda skotveiðimenn á að áætlunin sé gerð án aðkomu SKOTVÍS. Þeim hafi ekki á neinu stigi málsins verið boðin aðkoma að undirbúningsferlinu eins og skýrt sé kveðið á um í lögum um þjóðgarðinn.  Auk þess sé farið á svig við stjórnsýslulög, t.d. með takmörkunum sem gangi gegn meðalhófsreglu stjórnsýslulaga. í ályktun frá stjórn Skotvís segist stjórnin harma að fyrirheit um samráð hafi verið svikin og spyr hvort þetta sé forsmekkurinn að því sem koma skal þegar fjalla á um mál sem snúa að náttúruvernd.

„Stjórn Skotvís hefur ítrekað bent á annmarka í ferlinu og forsendur veiðitakmarkanna og gefið kost á því að ræða tillögurnar efnislega.  Hvorki stjórn þjóðgarðsins né ráðherra hafa sýnt því áhuga.  Þrátt fyrir niðurstöðu ráðherra, þá lítur stjórn SKOTVÍS svo á að umhverfisráðherra hafi með yfirlýsingu sinni viðurkennt misbrestina í ferlinu með því að bæta fyrir mistökin og taka upp samráð varðandi samgöngur innan þjóðgarðsins, en slíkt samráð stendur skotveiðimönnum ekki til boða.  Eðlilegt er að málefni skotveiðimanna, s.s. er snúa að veiðistjórnun séu sett í sama farveg, því annars mun ekki ríkja almenn sátt um Vatnajökulsþjóðgarð,“ segir í ályktun SKOTVÍS.