Millistjórnendur betur launaðir en bankastjóri vegna launastefnu

Ríkið verður að vera samkeppnishæft við einkageirann til lengri tíma þegar kemur að launum, segir Fjármálaráðherra. Millistjórnendur eru betur launaðir en bankastjóri Landsbankans vegna launastefnu ríkisins.

Að minnsta kosti átta millistjórnendur í Landsbankanum eru með fjögurhundruð þúsund króna hærri laun en yfirmaður sinn, bankastjórinn sjálfur, sem ekki má vera með hærri laun en forsætisráðherra þar sem kjör hans eru úrskurðuð af kjararáði. Steingrímur J. Sigfússon, fjármálaráðherra, er hugsi yfir þessari stöðu innan bankans.

„Þetta er auðvitað umhugsunarefni," segir Steingrímur J. Sigfússon. „Þessi staða leiðir af þessum samræmdu aðgerðum til að ná niður launakostnaði hæst launuðustu starfsmanna ríkisins, sem eru hluti af ráðstöfunum sem gripið var til strax á árunum 2008 og 2009. Þá kemur þessi staða upp, en auðvitað mun vinnast úr henni með einhverjum hætti í framtíðinni. Smátt og smátt þróast þessi mál í takt við kjarasamninga og aðstæður á markaði."

Bankasýsla ríkisins, sem fer með hlut hins opinbera í bankanum, hefur gagnrýnt að bankastjórinn fái ekki sambærileg laun og hinir bankastjórarnir og segir sérreglur af þessu tagi um ríkisbankann geta hafa slæm áhrif á verðmæti hans og þannig almannahagsmuni. En er fjármálaráðherra sammála gagnrýni af þessu tagi?

„Til lengri tíma litið, þá er það sjálfsagt rétt að það gangi ekki að tiltekin starfsemi ríkisins sé alls ekki samkeppnisfær í launum við almennan markað. Auðvitað verður að vera hægt að tryggja ríkinu hæft starfsfólk sem er sæmilega sátt við sín kjör, og ekki bara bönkum heldur einnig ráðuneytum og stofnunum. En það mun taka tíma að vinna úr þeim aðstæðum sem hér sköpuðust."

Fjármálaráðherra segir mikilvægt að menn séu meðvitaðir um það að launamálin verði að geta þróast í átt til jafnvægis milli opinbera- og einkageirans, þó ríkið ætli ekki að verða leiðandi í launamálum. Hann varar þannig við ofurlaunasamkeppni á fjármálamarkaði í ljósi reynslunnar. En verður skipt um kúrs í launastefnu hins opinbera?

„Ég ætla ekkert að gefa út um það á þessu stigi mála," segir Steingrímur. „Það er alveg ljóst að við erum áfram talsmenn hófsemi í þessum launamálum, og það er ekki ætlunin að ríkið verði leiðandi á nokkrum stað í þeim efnum, heldur að halda í við þá þróun sem framundan er."