Bubbi á nærbuxunum biður Heiðar Má afsökunar

Tónlistarmaðurinn Bubbi Morthens hefur beðið fjárfestinn Heiðar Má Guðjónsson opinberlega afsökunar á pistli sem hann skrifaði á pressuna fyrir nokkru síðan. Pistillinn bar yfirskriftina „Krónuníðingar" en þar fjallaði Bubbi um meinta stöðutöku Heiðars gegn krónunni og vitnaði þar í blaðið DV.

Pistill Bubba var lagður fram í málsgögnum Heiðars Más í meiðyrðamáli sem hann hefur höfðað gegn ritstjórum og fréttastjóra DV en málið var tekið fyrir í Héraðsdómi Reykjavíkur í gær.

Í nýja pistlinum hans Bubba segist hann meðal annars taka til baka setninguna: „Líkur benda til þess að Heiðar Már hafi tekið stöðu gegn krónunni eins og margir aðrir bankar og Lífeyrssjóðir."

„Við skulum samt hafa í huga að lýsingar DV á þínum viðskiptum voru ekki fagrar og hafi þær verið réttar, stend ég við hvert orð. En það skal alveg vera á hreinu að sé svo ekki, bið ég þig auðmjúkur afsökunar."

Þá segist Bubbi skrifa pistilinn á nærbuxunum einum saman. „Af auðmýkt og einlægni bið ég þig afsökunar ef ég hef sært þitt viðkvæma vitsmunalíf og raskað svefnró þinni. Ég skrifa þennan pistil á fjórum fótum eingöngu klæddur í gamlar Boss nærbuxur til að undirstrika auðmýkt mína," skrifar hann.

Og Bubbi vill ekki málsókn út af pistlinum. „Að þessu sögðu bið ég þig að þyrma mér gegn mögulegri lögsókn því ég er lélegur áhugafjárfestir sem á lítið af aur, en hins vegar fimm yndisleg börn, tvo gítara og skrítinn kött. Ég vona þú takir þessa afsökunarbeiðni góða og gilda," segir hann að lokum.