Lilju virðist hafa snúist hugur

Í kvöldfréttum Stöðvar 2 í gærkvöld útilokaði Lilja Mósesdóttir ekki að stofna nýjan stjórnmálaflokk. Í upphafi þingfundar í dag sagði hún þetta mikla spunafréttamennsku. Hins vegar vakti athygli að í máli hennar kom ekki fram að hún væri hætt að íhuga stofnun nýs flokks.

Frétt stöðvar tvö í gærkvöld vakti hörð viðbrögð flokkfélaga Lilju Mósesdóttur. Þar kvaðst Lilja vera að skoða alla möguleika og gekkst við því að íhuga að stofna nýjan stjórnmálaflokk en ákvörðun var tekin í gær um að stofna nýjan þingflokk fyrst um sinn.

Í upphafi þingfundar í dag sagði Lilja hins vegar mikla spunafréttamennsku einkenna þessa frétt. Hún íhugi ekki að stofna nýjan stjórnmálaflokk.

„Í gærkvöldi bjó Stöð 2 til þá spunafrétt að ég íhugi að stofna nýjan flokk til höfuðs Vinstri grænum."

Þetta sagði hins vegar Lilja í kvöldfréttum okkar í gær, aðspurð um framtíð sína innan Vinstri grænna: „Við höfum smá tíma til að ákveða hvort við bjóðum okkur fram."

Aðspurð hvort þetta þýði að hún ætli að stofna nýjan stjórnmálaflokk sagði Lilja síðan: „Hvað mig varðar er ég að skoða ýmsa möguleika, já."