Samfylkingarkonur ánægðar með Jóhönnu

Samfylkingarkonur hittust á ársþingi sínu í Hveragerði um helgina. Í ályktun þingsins er lýst yfir ánægju með störf Jóhönnu Sigurðardóttur, fyrsta kvenforsætisráðherra sögunnar. Nýr formaður, Elfur Logadóttir var einnig kjörin á þinginu og tekur hún við keflinu af Steinunni Valdísi Óskarsdóttur.

„Ársþing kvennahreyfingar Samfylkingar lýsir yfir ánægju sinni með störf fyrsta kvenforsætisráðherra Íslandssögunnar, Jóhönnu Sigurðardóttur," segir meðal annars. „Á liðnu ári hefur ríkisstjórn undir forystu Jóhönnu tekist á hendur eitt erfiðasta verkefni sem nokkur ríkisstjórn hefur staðið frammi fyrir, að endurreisa íslenskt efnahagslíf við afar erfiðar aðstæður. Mörg stór verkefni bíða en ekki má gleyma að á sama tíma hefur margt áunnist í íslenskri kvennabaráttu."

Þá er vakin sérstök athygli á fátækt og erfiðri fjárhagsstöðu sem margar konur og börn þeirra búa við. „Meirihluti öryrkja, aldraðra og láglaunafólks hér á landi er konur og þúsundir kvenna eru atvinnulausar. Þá eru einstæðir foreldrar í langflestum tilfellum konur. Konur og börn af erlendum uppruna eru í sérstakri áhættu fyrir félagslegri mismunun. Sveitarstjórnir og ríkisvald skulu taka mið af þessum staðreyndum í ákvörðunum og aðgerðum sínum. En baráttan fyrir frelsi og réttindum kvenna einskorðast ekki við landsmálin. Miklu skiptir að ríkisstjórn undir forystu Samfylkingarinnar sé leiðandi í samstarfi og stuðningi við konur og samtök þeirra á alþjóðlegum vettvangi af framsýni og myndarbrag. Þá vill Kvennahreyfing Samfylkingarinnar brýna ríkisstjórn Íslands í því verkefni að vinna að friði og gegn stríðsrekstri hvers konar."

Ársþingið fagnaði einnig nýsamþykktum lögum um jafna skiptingu karla og kvenna í stjórnum fyrirtækja. „Í ljósi þess að stjórnir fyrirtækja á Íslandi hafa frá upphafi nær eingöngu verið skipaðar karlmönnum er þetta skref löngu tímabært."

Ályktunina má sjá í heild sinni hér.