Leita að aukaleikurum í nýja mynd

Þessa dagana er verið að taka upp nýja kvikmynd, Hrafna, Sóleyjar og Myrru, sem stendur til að frumsýna í Sambíóunum í febrúar á næsta ári, að sögn Kristjáns Hans Óskarssonar kvikmyndaframleiðanda. Það er Kvikmyndafélagið Einstefna sem framleiðir myndina en aðalleikararnir eru meðal annars Laddi, Edda Björgvinsdóttir, Pétur Einarsson, Hannes Óli Ágústsson, Magnús Ólafsson og fleiri.

Til stendur að taka upp hópatriði í myndinni við Bókasafn Hafnarfjarðar á fimmtudaginn næsta klukkan sex síðdegis og leita framleiðendurnir eftir allt að 400 manns til að koma fram í atriðinu. „Þetta á sér stað á sautjánda júní í Hafnarfirði. Í þessu atriði eru nokkrar aðalpersónur myndarinnar að halda sautjánda júní og við erum að reyna að sviðsetja svona 17. júní hátíð," segir Kristján Hans í samtali við Vísi.





Leita að fullorðnu fólki

Kristján Hans og félagar leita að fólki á öllum aldri, en segja að þótt börn og unglingar séu velkomin sé mikilvægt er að stór hluti þátttakenda sé fólk sem talist geti fullorðið (t.d. 23 - 90 ára). Það verður sælgæti á staðnum fyrir börnin og pylsur fyrir svanga. Framleiðendur myndarinnar segja í tilkynningu sem þeir sendu frá sér að þetta atriði sé bæði áberandi og mikilvægt atriði í kvikmyndinni.

Framleiðendur biðja fólk um að staðfesta mætingu á netfangið L7.17.juni@gmail.com.