Dönsuðu tangó fram á morgun

Tangóunnendur og tangódansarar skemmtu sér í Iðnó og Ráðhúsi Reykjavíkur í nótt og dönsuðu fram á morgun. Tilefnið var upphaf þriggja daga tangómaraþons sem ætlað er að styrkja og vekja athygli á átakinu Karlmenn og krabbamein.

Tangódansarar landsins ættu að hafa nóg fyrir stafni um helgina. Í gærkvöldi klukkan átta hófst þriggja daga tangómaraþon sem Tangófélagið efndi til til styrktar átaki Krabbameinsfélags Íslands í mars. Tangómaraþonið sjálft ber heitið Opinn faðmur og vísar til þess að öllum er boðið að vera með í þessu átaki svo lengi sem þeir breiði út faðminn, tilbúnir í dans.

Dagskráin hófst í gærkvöldi og er óhætt að segja að þátttakendur hafi dansað hafi verið fram á rauða nótt þar sem dansað var til klukkan fimm í morgun.

Nú um hádegi byrjar dans ástarinnar aftur að duna og mun ekki stöðvast fyrr en í kvöld þegar haldið verður í kvöldverð á veitingahúsinu Pisa klukkan sjö. Um hálf níu byrjar fólk aftur að dilla sér við hrynjandi tónlistarinnar og mun væntanlega ekki linna látunum fyrr en klukkan fimm í nót ef að líkum lætur.

Áhugasömu fólki sem ekki hefur lært tangó er bent á að aðgangseyrir er 3500 krónur en fyrir það fé fæst kennsla, aðgangsmiði á maraþonið og bolur. Allur ágóði rennur til átaksins Karlmenn og krabbamein.

Ekki mun væsa um gesti að sögn skipuleggjanda maraþonsins því í boði verður te, kaffi, vatn og ávextir á meðan á maraþoni stendur. Dagskráin stendur allt til klukkan sex á sunnudag.