Ógn við samfélagið

Samstarf vélhjólaklúbbsins MC Iceland, áður Fáfnis og erlendra deilda Hells Angels glæpasamtakanna sem og fyrirhuguð innganga íslenska hópsins í samtökin skapar hættu á aukinni skipulagðri glæpastarfsemi á Íslandi og felur því í sér ógn við samfélagið. Þetta kemur fram í fréttatilkynningu frá lögreglunni vegna ákvörðunar yfirvalda að senda Leif Ivar Kristanssen, foringja Hells Angels samtakanna í Noregi, sem var stöðvaður við komuna til landsins í gær aftur til Noregs með flugi í morgun.

„Það er mat lögreglunnar að meina beri erlendum félögum í Hells Angels landgöngu m.a. með það að markmiði að sporna við fyrirhuguðu inngönguferli MC Iceland í Hells Angels," segir í tilkynningunni.

Þar segir að koma Leifs Ivars til Íslands tengjast án vafa fyrirhugaðri inngöngu íslenska vélhjólaklúbbsins í Hells Angels. Við þá inngöngu fái íslenski hópurinn stöðu fullgildrar deildar innan Hells Angels.

„Til þess að hljóta fulla aðild mun íslenski hópurinn þurfa að geta sýnt fram á að starfsemi og skipulag sé í samræmi við kröfur Hells Angels. Þetta eykur hættu á aukinni skipulagðri glæpastarfsemi af hálfu íslensku félaganna."

Þá er minnt á að afar algengt sé að félagar í Hells Angels hafi hlotið refsidóma fyrir alvarleg afbrot og ljóst sé að í röðum þeirra sé að finna marga ofbeldismenn. Þetta eigi einnig við um nokkra félaga í MC Iceland.

Tilkynningu lögreglunnar er hægt að lesa í heild sinni hér.