Ekkert fararsnið á Atla

„Ég þykist vita að flokkurinn standi nógu lýðræðislega sterkum fótum til að þola þessa umræðu," segir Atli Gíslason, þingmaður Vinstri grænna. Hann segir ekkert fararsnið á sér. „Ég er rótgróinn í flokknum eins og eikartré. Ég er að vona að flokkurinn fari ekki of langt frá mér og stefnumiðum sínum."

Atli var einn þriggja þingmanna VG sem sátu hjá við afgreiðslu fjárlagafrumvarpsins í dag sem var samþykkt með minnstum mögulegum meirihluta á Alþingi. Steingrímur J. Sigfússon, fjármálaráðherra og formaður VG, sagði í fréttum Stöðvar 2 í kvöld að um alvarlegan atburð væri að ræða. Í samtali við RÚV sagði hann auk þess að þremenningunum væri tæplega sætt í þingflokknum. „Nei, tæplega eins og ekkert hafi í skorist því þetta er nokkuð erfið uppákoma,“ sagði Steingrímur.

Þremenningarnir eru boðberar nýrrar stjórnmálamenningar, að mati Atla. „Íslensk stjórnmálamenning fékk falleinkunn í skýrslu rannsóknarnefndar Alþingis. Sérstaklega í 8. bindi siðanefndarinnar. Við erum að reyna að tileinka okkur boðskap þessarar siðanefndar og breyta íslenskri stjórnmálamenningu. Koma upp úr skotgröfum og foringjaræði og öðru slíku og vinna lýðræðislega saman." Auk þess segir Atli: „Tímarnir eru að breytast rétt eins og Bob Dylan sagði í sínu ágæta lagi Times they are changing."

Atli segist hafa verið í sambandi við Lilju og Ásmund Daða í kvöld auk fjölmargra flokksmanna. „Ég hef fengið skeyti í kvöld. Flest eru hrósskeyti en sum eru fyrir neðan mitti. Það er bara þannig en ég að reyna að ástunda málefnalega pólitík."

Atli viðurkennir að það sé ekki auðvelt að eiga í átökum og deilum við eigin flokksfélaga. Um Steingrím segir hann: „Við höfum báðir þroska til að ræða þessa hluti."