Þrír þingmenn VG styðja ekki fjárlagafrumvarpið

Þrír þingmenn Vinstri hreyfingarinnar - græns framboðs munu ekki styðja fjárlagafrumvarpið fyrir næsta ár. Atkvæðagreiðsla um frumvarpið hófst laust eftir klukkan ellefu í morgun. Þingmennirnir sem telja sig ekki geta stutt frumvarpið eru Lilja Mósesdóttir, Atli Gíslason og Ásmundur Einar Daðason.

„Það eru mikil vonbrigði að varnaðarorð um að fjárlögin munu dýpka kreppuna hafi ekki verið tekin alvarlega," sagði Lilja Mósesdóttir í umræðum um atkvæðagreiðsluna. Haldið væri dauðahaldi í efnahagsáætlun sem unnin var í samstarfi við Alþjóðagjaldeyrissjóðinn jafnvel þótt forsendur hennar væru brostnar.

Lilja sagði að þau þremenningarnir hefðu lagt fram tillögu innan þingflokks VG um breytta forgangsröðun sem hefði ekki hlotið hljómgrunn. Ásmundur Einar Daðason tók undir orð Lilju Mósesdóttur í máli sínu.