Ný sprunga gæti opnast

Búist er við að þúsundir manna leggi leið sína að gosströðvunum á Fimmvörðuhálsi í dag. Mikill kraftur er enn í gosinu og ekki útilokað að nýjar sprungur myndist.

Aðdráttarafl eldgossins á Fimmvörðuhálsi er mikið og komu þúsundir manna að gosstöðvunum í gær. Búist er við svipuðum fjölda eða fleira fólki í dag, enda veður á svæðinu gott en kalt. Víðir Reynisson deildarstjóri almannavarna hjá Ríkislögreglustjóra segir ástandið við gossvæðið gott.

Fólk mætir á svæðið í rútum, bílum, flugvélum og öðrum farartækjum og margir leggja á sig erfiða gönguferð upp að gosstöðvunum.

Víðir segir viðbragðsaðila gera allt til að fólk geti komið og skoðað eldstöðvarnar og mikið lagt í að hafa öryggisgæslu í lagi. Fólk verði hins vegar að virða þær takmarkanir sem settar hafi verið á svæðinu. Til að mynda er alveg bannað að koma vestanmegin að gosstöðvunum.

Heimilt er að fara út frá Þórsmörk uppá Morinsheiði en bannað er að fara upp á Bröttufönn og Heljarkamb. Í fyrrakvöld opnaðist snögglega ný gossprunga á svæðinu sem sýnir að hlutirnir geta gerst hratt.