Langur biðlisti eftir eggjum

Frumvarp sem gerir einhleypum konum með skerta frjósemi heimilt að nota gjafaegg við glasafrjóvgun bíður afgreiðslu á Alþingi. Guðmundur Arason, kvensjúkdóma- og fæðingarlæknir í tæknifrjóvgunarstofunni Art Medica, fagnar því verði frumvarpið samþykkt. Til þess að mæta þeirri þörf sem þá myndist þurfi þó fleiri íslenskar konur að gefa egg enda er nú þegar skortur á eggjum.

„Biðlistinn er langur og okkur bráðvantar egg fyrir konur sem ekki hafa allar tímann fyrir sér," segir Guðmundur.

Þær konur sem geta gefið egg þurfa að vera á aldrinum 22ja til 35 ára. Þær þurfa að vera hraustar, lausar við vímugjafa og ekki með ættgenga sjúkdóma sem erfast beint.

Fyrir þau óþægindi sem hljótast af egggjöf eru greiddar 75 til 100 þúsund krónur. „En við viljum ekki að fólk komi til með að hagnast," tekur Guðmundur fram.- þlg, sg