Notaði lögguna sem sýningardæmi - var svo ákærður fyrir ofbeldi

Tæplega þrítugur karlmaður hefur verið ákærður á ný fyrir brot gegn valdstjórninni en máli hans var vísað frá Héraðsdómi Austurlands haustið 2009 þar sem í ljós kom að lögreglan á Eskifirði reyndist óheimilt að rannsaka málið þar sem meint ofbeldið snéri að lögreglumanni embættisins.

Maðurinn er sakaður um að hafa löðrungað lögreglumanninn við skyldustörf í júlí 2009. Atvikið átti sér stað heima hjá manninum á Fáskrúðsfirði. Í fyrri dómi, sem var vísað frá, sagðist maðurinn hafi klappað lögreglumanninum lauslega á kinnina. Það hafi hann gert til þess að sýna honum hvað hann gerði við konuna sína, en útkallið snéri að heimilisofbeldi.

Svo virðist sem ákæruvaldið túlki klappið á kinnina sem löðrung og því hefur ríkissaksóknari gefið út á ákæru í málinu. Málið var þingfest í Héraðsdómi Reykjaness í dag.

Ekki er langt síðan lögregluembættið á Selfossi varð uppvíst af sambærilegum mistökum. Þá var ákært fyrir brot gegn valdstjórninni. Málinu var síðan vísað frá dómi vegna vanhæfis Sýslumannsins á Selfossi til að fara með rannsókn þess.