Myrti sex úr sömu fjölskyldunni

Sex af fórnarlömbum byssumannsins sem myrti sjö og særði 14 í slóvösku höfuðborginni Bratislava í morgun komu úr sömu fjölskyldunni. Maðurinn sem var vopnaður haglabyssu og tveimur skammbyssum var einn að verki. Hann tók eigið líf eftir að lögreglumenn króuðu hann af.

Maðurinn myrti fólkið í íbúð í fjölbýlishúsi í úthverfi borgarinnar, að því er fram kemur á vef Sky-fréttastofunnar. Fyrir utan húsið skaut maðurinn konu til bana og særði 14, þar á meðal þriggja ára gamalt barn. Hinir særðu eru ekki alvarlega særðir.

Ekki er vitað hver ástæða árásarinnar var. Lögreglu hefur ekki tekist að bera kennsl á manninn.