Samfylkingin boðar til flokksstjórnarfundar

Flokksstjórn Samfylkingarinnar kemur saman næstkomandi laugardag á Hótel Loftleiðum í Reykjavík. Þetta er þriðji flokksstjórnarfundurinn frá kosningunum fyrir tæpu ári.

Fundurinn hefst klukkan 13 með ræðu Jóhönnu Sigurðardóttur, forsætisráðherra, sem ber yfirskriftina Brýn verkefni framundan. Síðan taka til máls Dagur B. Eggertsson, borgarfulltrúi og varaformaður flokksins, sem fjallar um erindi Samfylkingarinnar í sveitarstjórnarkosningunum og Árni Páll Árnason, félags- og tryggingarmálaráðherra, sem fjallar um ný úrræði í skuldavanda heimilanna.

Fundir flokksstjórnar eru opnir öllu Samfylkingarfólki, að fram kemur í tilkynningu.