Prestur iðrast prófkjörssynda

Séra Bjarni Karlsson, frambjóðandi í prófkjöri Samfylkingarinnar í Reykjavík, er fullur iðrunar og biður aðra frambjóðendur afsökunar á auglýsingu sem hann birtir í Fréttablaðinu í dag. Hann segir sig og stuðningsmenn hans hafa farið of geyst.

Auglýsingin hefur valdið taugatitringi á meðal annarra frambjóðenda flokksins vegna þess að samkvæmt prófkjörsreglum Samfylkingarinnar í Reykjavík er þeim óheimilt að auglýsa framboð sitt í fjölmiðlum. Frambjóðendum er einungis heimilt að auglýsa fundi eða aðra viðburði. Í auglýsingu Bjarna lýsa 15 einstaklingar yfir stuðningi við hann.

„Þessi mistök sýna að ég er nýliði í pólitík og að stærstur hluti þeirra sem með mér standa eru það líka," segir Bjarni í pistli á Eyjunni.

„Ég finn mig knúinn til að biðja samframbjóðendur mína afsökunar og fullvissa þá og stuðningsmenn þeirra ásamt kjörstjórn Samfylkingarinnar um að á bak við þessa auglýsingu lá ekki viðleitni til að sveigja reglur í því mikilvæga samstarfi sem prófkjörið er. Vona ég að þetta frumhlaup verið ekki til þess að skemma samstöðu okkar í framhaldinu," segir Bjarni í pistlinum sem hægt er að lesa hér.