Ekki inn í gilin í Þórsmörk án súrefniskúta

Þótt Þórsmörk hafi nú verið opnuð á ný verður fólki bannað fara inn í gilin sem hraunið rennur um vegna hættu á eiturgasi og gufusprengingum.

Vegurinn inn í Þórsmörk er aðeins jeppafær en svona sést gosið þegar horft er af eyrunum skammt frá Langadal. Vafalaust má sjá enn betur til gosstöðvanna af hæðum og fjöllum eins og Valahnjúk og margir munu freistast til að ganga leiðina úr Básum upp á Morinsheiði sem hér er sýnd með grænum lit.

Fulltrúar almannavarna í fylgd Hjálparsveita skáta í Kópavogi könnuðu þessa gönguleið í gær og telja hana vel færa, svo fremi að fólk sé með ísexi. Menn eru þó varaðir við að fara lengra en upp á Morinsheiði og alls ekki á Heljarkamb, enda er snarbratt þaðan niður í bæði Hrunagil og Hvannárgil, þar sem hraunið fossar niður. Hraunárnar koma auk þess í veg fyrir að lengra verði komist.

Almannavarnir banna hins vegar alla umferð fólks um Hrunagil og Hvannárgil, sem hraunið rennur um, vegna hættu á eitruðu gasi og gufusprengingum inni í giljunum. Við Stöðvar 2 menn fóru reyndar inn í Hrunagil í gær með leyfi yfirvalda en stíf norðanátt blés gufum frá okkur og inn gilið. Áin er orðin brennandi heit nokkur hundruð metrum neðan við hraunjaðarinn en við ákváðum að halda okkur uppi í hlíðinni þegar við nálguðumst nýja hraunið enda er gilið á þessum slóðum afar þröngt.

Víðir Reynisson hjá almannavörnum segir að vísindamenn telji þessa hættu það alvarlega að þeir hafi ákveðið að þeirra fólk fari ekki inn í gilin án sérstaks búnaðar, bæði reykköfunarbúnaðar og mæla. Gasgrímur gagnist ekki heldur þurfi menn að vera með loft í kút til að komast óhultir inn.

Hraunið á eftir að renna um einn kílómetra eða svo til að komast niður á þessar breiðu eyrar en frá þeim þarf það svo að renna annan kílómetra til viðbótar til að ná niður að Krossáraurum innst í Þórsmörk.