Ráðist á svæði nærri landamærum Afganistans

Ómannaðar flugvélar Bandaríkja­hers skutu flugskeytum á hús á tveimur stöðum í Norðvestur-Pakistan í gær. Haft er eftir heimildarmönnum innan hersins að tólf hafi verið drepnir í árásunum. Þeir hafi verið herskáir andspyrnumenn.

Bandaríkjaher er sagður hafa staðið fyrir yfir hundrað árásum á hálfsjálfstæðu ættbálka­svæði við landamærin að Afganistan. Flestar hafa þær verið í bæði norður- og suðurhluta Waziristans, en þar eru hermenn talibana sagðir eiga skjól.

Í fyrri árásinni var skotið á tvö hús og fimm menn drepnir. Að auki eru fjórir grunaðir andspyrnumenn sagðir hafa slasast. Í seinni árásinni voru sjö grunaðir andspyrnumenn drepnir þegar tveimur eldflaugum var skotið á hús.

Þetta hefur fréttastofa AP eftir nafnlausum heimildarmönnum innan Bandaríkjahers. Bandaríkin hafa ekki opinberlega gengist við aðgerðir undir stjórn Leyniþjónustu Bandaríkjanna (CIA) þar sem notast er við fjarstýrðar herflugvélar. Haft er eftir embættismönnum að nokkrir háttsettir menn innan bardagasveita bæði talibana og Al Kaída hafi verið drepnir með þessum hætti.

Opinberlega fordæmir Pakistan eldflaugaárásir Bandaríkjanna í landinu, en landið er þó sagt hafa verið handgengt Bandaríkjunum í fyrri slíkum árásum.

- óká