Dagur: Borgin setur 230 milljónir í golfvöll

Dagur B. Eggertsson, borgarfulltrúi Samfylkingarinnar, segir að Hanna Birna Kristjánsdóttir, borgarstjóri, sé í kosningaham. Tillaga sem hún lagði fram í borgarráði í dag um að 230 milljónir verði settar í að bæta 9 holum við golfvöllinn á Korpúlfsstöðum sýni það.

Dagur segir í tilkynningu að málinu sé augljóslega ætlað að afla vinsælda í aðdraganda borgarstjórnarkosninga þar sem fjölmargir séu á biðlista eftir að komast í Golfklúbb Reykjavíkur. Hann gagnrýnir forgangsröðunina.

„Á sama tíma er hvarvetna mikill niðurskurður og launalækkanir. Forvarnarsjóður hefur verið lækkaður, afleysingarkennslu hætt, biðlistar í leikskólum lengdir, frístundakortin barna fryst og sumarstörfum stórfækkað, svo aðeins séu tekin örfá dæmi," segir Dagur.

Í bókun sem Samfylkingin lagði fram í borgarráði segir að

golf sé góð íþrótt sem margir hafi áhuga á en það sé ekki hægt að ætlast til þess að borgarbúar, foreldrar, starfsfólk og önnur íþróttafélög sætti sig við erfiðan sparnað og áframhaldandi aðhald þegar borgarstjóri snari fram 230 milljónum í golfvöll.