Þingmenn vilja bólusetja gegn leghálskrabba

Lögð hefur verið fram þverpólitísk þingsályktunartillaga á Alþingi um að fela heilbrigðisráðherra að hefja undirbúning að bólusetningu allra 12 ára stúlkna gegn HPV smiti og leghálskrabbameini.

Árlega greinast um tuttugu konur með leghálskrabbamein og þrjár deyja úr sjúkdómnum. Helstu orsakir sjúkdómsins má rekja til HPV sýkingar á kynfærum og er kynhegðun fólks helsti áhættuþáttur fyrir smiti.

Með því að bólusetja allar tólf ára stúlkur hér á landi yrði komið í veg fyrir um tvö dauðsföll á ári. Kostnaður við bólusetningu er talinn vera á annað hundrað milljónir. Málið verður tekið fyrir í heilbrigðisnefnd.