Flugumferð dróst saman milli ára

Í þriðja skiptið á jafnmörgum árum fór fjöldi flugvéla um íslenska flugstjórnarsvæðið, sem er 5,4 milljónir ferkílómetrar að stærð, yfir 100 þúsund markið. Heildarfjöldinn á síðasta ári var 101.504 þúsund flugvélar. Ef miðað er við árið 2008 þá dróst flugumferð saman um 8% en þá fóru 110.366 flugvélar um íslenska flugstjórnarsvæðið og höfðu aldrei orðið fleiri, að fram kemur í tilkynningu frá Flugstoðum.

Þar segir að 24.4% flugumferðarinnar voru flugvélar í flugi til eða frá Íslandi en árið 2008 var þessi tala 27,8%. Að meðaltali komu 278 flugvélar á dag inn á svæðið.

Flugumferðin var mest í ágúst eða tæplega 12 þúsund flugvélar. Flugvélar Icelandair voru tíðustu gestirnir inn á svæðinu. Því næst komu í réttri röð þýska félagið Lufthansa, British Airways, United Airlines og Delta Airlines.

Flugleiðin á milli London - Los Angeles var sú flugleið sem var oftast flogin inn á flugstjórnarsvæðinu, því næst London - San Francisco og þriðja algengasta flugleiðin var frá ¬ Kaupmannahöfn til Keflavíkur.

Boeing flugvélar komu oftast inn á íslenska flugstjórnarsvæðið á síðasta ári og voru í þremur efstu sætunum, flestar voru Boing 777-200, í öðru sæti Boing 767-300 og í þriðja sæti var Boing 757-200.