Þorrablóti á Klörubar frestað í annað sinn

Þorrablóti sem hefur verið haldið árlega í nokkur ár á Íslendingabarnum Klörubar á Kanaríeyjum hefur verið frestað öðru sinni vegna kreppunnar.

Klara Baldursdóttir eigandi barsins segir að töluvert færri séu nú á Kanaríeyjum en fyrir kreppu en áður fyrr voru þorrablótin þar mikið sótt. Hún segir flutningsgjöld á þorramatnum hafa hækkað verulega og taldi það ekki svara kostnaði þetta árið. Klörubar bjóði hins vegar uppá saltkjöt og baunir á sprengidaginn og íslenskar rjómabollur á bolludaginn.

Á annað þúsund manns voru á Kanaríeyjum yfir hver jól og áramót fyrir hrun en Klara áætlar að Íslendingarnir hafi verið um fjögur hundruð yfir síðustu jól. Hún segist vona að Íslendingunum fjölgi á þessu ári svo hún geti haldið þorrablót að ári.