Ráðuneytið úrskurðaði ekki í samræmi við lög

Félagsmálaráðuneytið úrskurðaði ekki í samræmi við lög þegar það synjaði eiganda heilsulindar um atvinnuleyfi fyrir sérhæfðan nuddara sem hann hafði auglýst eftir á taílenska heilsulind, samkvæmt úrskurði umboðsmanns Alþingis.

Forsaga málsins er sú að eigandi nuddstofunnar auglýsti eftir starfsmanninum á heilsulind en gerði meðal annars kröfur um að starfsmaðurinn skyldi vera útskrifaður úr virtum taílenskum nuddskóla, kynni skil á taílenskum spa-hefðum og menningu, að hann kynni taílensku og gæti haft „snurðulaus samskipti við eiganda og hugmyndafræðing heilsulindarinnar“.

Kröfurnar sem gerðar voru áttu við eiginkonu eiganda nuddstofunnar.

Félagsmálaráðuneytið taldi að eigandinn hefði í starfsauglýsingunni gert óraunhæfar kröfur til þess sem ráðinn yrði í starfið og synjaði nuddaranum atvinnuleyfi á grundvelli þess að fólk á Evrópska efnahagssvæðinu hefði forgang að vinnu hér á landi. Ráðuneytið tók þar með undir úrskurð Vinnumálastofnunar sem taldi að „umrætt starf krefjist hvorki slíkrar sérþekkingar né að fullreynt sé að finna fólk til starfans á Evrópska efnahagssvæðinu“.

Umboðsmaður telur með áliti sínu að úrskurður ráðuneytisins hafi ekki verið reistur á réttum lagagrundvelli og að ráðuneytið hafi ekki rökstutt mál sitt nógu vel. Úrskurðurinn hafi því ekki verið í samræmi við lög. Hann beinir þeim tilmælum til félagsmálaráðuneytisins að það taki málið til nýrrar meðferðar komi fram ósk þess efnis. - kh