Norðlingaalda: 80% eru ógrónir melar

Áttatíu prósent af því landi sem fer undir Norðlingalón eru ógrónir melar, að mati Landsvirkjunar. Andstæðingar Norðlingaölduveitu segja Landsvirkjun hins vegar þegar búna að taka nóg af vatni Þjórsárvera.

Það virðist ekki deilt um það lengur að Þjórsárver eigi að vernda, fremur er tekist á um það hvort áhrifasvæði Norðlingaölduveitu geti talist til Þjórsárvera. Hér sjáum við fyrirhugað lónsstæði en helmingur þess verður í farvegi Þjórsár. Mest af því sem eftir stendur lítur svona út en um áttatíu prósent þess sem fer undir vatn er skilgreint sem melar og lítt gróið land.

Það gróðursvæði sem mest er rætt um að spillist er svokallað Eyvafen, sem við sjáum hér inn í, en oddviti Skeiða- og Gnúpverja, Gunnar Örn Marteinsson, hafnar því að það teljist hluti veranna. Hann kveðst hafa farið þarna oft um og segir að í sínum huga geti Eyvafen ekki talist hluti af Þjórsárverum. Þarna sé Eyvafenslækur og hann sé ekki ver sem slíkt.

Vatnamælingamaður Landsvirkjunar, bóndinn á Ásólfsstöðum, segir rangt að lónið sökkvi feninu. "Það er ekki verið að sökkva Eyvafeni," segir Sigurður Páll Ásólfsson.

Hann segir Eyvafen fara á kaf á hverjum einasta vetri af náttúrulegum ástæðum, þegar Þjórsá bólgni upp vegna íss og krapa. Það þurfi ekkert lón til að vatn gangi langt inn í Eyvafen.

Helsti baráttumaður fyrir því að friðlýsa þetta umdeilda svæði, Gísli Már Gíslason, prófessor og formaður Þjórsárveranefndar, bendir hins vegar á að gróður þarna sé í mikilli framför. Það sé verið að skerða það, - á svæði sem hafi hingað til verið óraskað.

Svæðið er þó þegar virkjað með Kvíslaveitum en með þeim voru 40 prósent af rennsli efri Þjórsár flutt til Þórisvatns fyrir aldarfjórðungi. Landsvirkjun vill með Norðlingaöldulóni fá 30 prósent í viðbót af vatni Þjórsár, en Gísli segir nóg komið.

Þetta lón sé til viðbótar því sem þegar sé búið að gera og með þessari framkvæmd verði framkvæmdir fluttar vestur fyrir Þjórsá. Þar með sé verið að spilla nýju svæði. Áður hafi verið búið að fallast á að taka svæðið austan Þjórsár gegn því að það yrði á valdi náttúruyfirvalda hvort meira yrði gert og þau hafi verið búin að hafna því.