Ólafur Ragnar hitti Íþróttaálfinn í Kína

Ólafur Ragnar Grímsson, forseti Íslands,  flutti í gær setningarræðu á orkuráðstefnu sem haldin var í sýningarskála Íslands á heimssýningunni í Shanghai. Ráðstefnuna sóttu forystumenn orkumála víða að úr Kína ásamt stjórnendum orkustofnunar landsins sem og kínverskir sérfræðingar.

Efni ráðstefnunnar var að kynna reynslu Íslendinga af nýtingu hreinnar orku, einkum jarðhita, sem gæti nýst

Kínverjum, með sérstakri áherslu á lagningu hitaveitna í kínverskum borgum og bæjum, sem og með því að loftkælingarkerfi borganna yrðu að einhverju leyti knúin með jarðvarma.

Í heimsókn sinni til Kína hefur Ólafur Ragnar rætt við fjölda kínverskra fjölmiðla og hafa viðtölin að mestu snúist um árangur Íslands við nýtingu hreinnar orku, þátttöku íslenskra fyrirtækja og sérfræðinga í nýtingu jarðvarma í Kína, áhrif fjármálakreppunnar á Ísland og endurreisn hagkerfisins.

Forsetinn heimsótti starfsstöðvar CCP-tölvuleikjafyrirtæksins þar sem nú starfa um 120 manns víðs vegar að úr heiminum, meðal annars frá Kína og Íslandi, við þróun á tölvuleiknum vinsæla Eve Online.

Ólafur Ragnar fór einnig í Hongkou-hverfið í Shanghai sem er vináttuhverfi Íslands í tengslum við Heimssýninguna. Þar var sérstök kynning á Latabæ í menningarmiðstöð hverfisins og tók mikill fjöldi skólabarna þátt í æfingum undir stjórn Íþróttaálfsins og Sollu stirðu.

Forsetinn heimsótti kínversku heimskautastofnunina og átti þar viðræður um bráðnun íss og opnun nýrra siglingaleiða sem tengja muni Asíu, Evrópu og Ameríku á nýjan hátt en Ísland liggur sérlega vel við slíkum siglingaleiðum. Kínverska heimsskautastofnuni gerir út öfluga leiðangra og hafa fjórir leiðangrar á hennar vegum verið farnir til norðurslóða á síðustu árum. Fram kom áhugi stjórnenda á að vinna með íslenskum vísindamönnum og mun sendinefnd frá stofnuninni koma til Íslands í byrjun október til að ræða nánara samstarf. Rædd hefur verið sú hugmynd að næsti leiðangur eigi viðdvöl á Íslandi eftir að hafa farið yfir norðurskautið.