Jóhanna kynnir frumvarp um bætur vegna illrar meðferðar á börnum

Jóhanna Sigurðardóttir, forsætisráðherra, hefur boðað til fundar með fréttamönnum eftir hádegi til að kynna frumvarp til laga sem ríkisstjórnin samþykkti á fundi sínum í morgun um sanngirnisbætur vegna misgjörða á stofnunum og heimilum fyrir börn.

Frumvarpið kveður á um bætur til fyrrverandi vistmanna á Breiðavíkurheimilinu, Heyrnleysingjaskólanum, Bjargi, Kumbaravogi, Reykjahlíð, Silungapolli, Jaðri, Upptökuheimili ríkisins og Unglingaheimili ríkisins, hafi þeir hlotið varanlegan skaða af illri meðferð eða ofbeldi á heimilunum.

Skýrsla vistheimilisnefndar um heimili í Kumbaravogi, Skólaheimilinu Bjargi og í Heyrnleysingarskólanum undir forystu Róbert Spanó var kynnt í september á síðasta ári. Nefndin kannaði áður starfsemi Breiðavíkurheimilisins og skilaði svartri skýrslu um vistheimilið í byrjun árs 2008.

Jóhanna sagði í september í fyrra ljóst að í mörgum tilfellum hafi börn á þessum heimilum sætt illri meðferð og kynferðislegu ofbeldi. Sér virtist málin ekki eins alvarleg og í tilviki Breiðavikursheimilisins. Skýrslan sýndi engu að síður að þetta væri svartur blettur í sögu þjóðarinnar.