Allar innkaupakerrur í notkun í Nettó

Langar biðraðir voru við alla innganga verslunar Nettó í Mjóddinni þegar hún opnaði í gærmorgun og fljótlega varð að grípa til þess ráðs að hleypa fólki inn í hópum. Það var bæði vegna þess að verslunin var að fyllast af fólki og eins vegna þess að allar innkaupakerrurnar voru komnar í notkun.

Ástæðan fyrir þessum mikla mannfjölda var að verslunin var að opna að nýju eftir miklar breytingar og tímamótunum var fagnað með því að bjóða viðskiptavinum upp á tilboð á ýmsum vörum. Þannig ruku út heilu kjötfjöllin af lambahryggjum, lambalærum, sviðum og svínahamborgarhryggjum.

Það voru ekki bara viðskiptavinir Nettó sem nutu góðs í gær, því við opnunina afhenti Ómar Valdimarsson, framkvæmdastjóri Samkaupa hf., sem eiga og reka Nettó, þremur aðilum veglega styrki.

Fyrst má nefna Mæðrastyrksnefnd Reykjavíkur, þá Landsamband eldri borgara og einnig Kærleiksboðberana, sem eru reglusystur Móður Teresu.