Breytt viðmið við mat á umsóknum um dvalar- og búsetuleyfi

Útlendingastofnun mun héðan í frá byggja mat á viðmiðum um trygga framfærslu umsækjenda um dvalar- og búsetuleyfi á heildartekjum fyrir staðgreiðslu. Þetta er niðurstaða endurskoðunar Útlendingastofnunar á reikniaðferð sinni

Endurskoðun reiknilíkaninu hófst eftir að sagt var frá því í kvöldfréttum Stöðvar 2 að Útlendingastofnun synjaði tælenskri konu um búsetuleyfi, þar sem talið var að hún gæti ekki framfleytt sér. Konan var samt sem áður í fullu starfi hjá Þvottahúsi ríkisspítalanna.

Útlendingastofnun segir að breytingin nái til allra dvalarleyfis- og búsetuleyfisumsókna sem séu í vinnslu hjá Útlendingastofnun. Á næstu vikum verði farið yfir þær ákvarðanir sem fólu í sér synjun umsókna um dvalar- eða búsetuleyfi á tímabilinu 1. október 2008 til desember 2009 þar sem ákvörðunin byggði á því viðmiði að miða skyldi við launatekjur eftir staðgreiðslu.