Yfir 700 manns fengu íslenskan ríkisborgararétt

Alls fengu 728 einstaklingar íslenskan ríkisborgararétt í fyrra en þeir voru 914 árið áður. Aldrei höfðu fleiri fengið íslenskan ríkisborgararétt en árið 2008. Hagstofan segir að árið 1991 hafi 161 einstaklingur fengið íslenskan ríkisborgararétt en þeim hafi fjölgað jafnt og þétt síðan.

Árið 1991 fengu fleiri karlar en konur íslenskt ríkisfang. Síðan þá hafa konur verið í meirihluta nýrra íslenskra ríkisborgara. Í fyrra fengu 414 konur  íslenskan ríkisborgararétt en 314 karlar.

Flestir af nýjum ríkisborgurum í fyrra voru frá Evrópu, þar af 153 frá Póllandi og 76 frá Serbíu. Næstflestir voru frá Asíu, þar af 106 frá Filippseyjum. Þetta er svipuð skipting og undanfarin ár.